بلوچی زبان جیڑہانی بُنجل اِنت۔ اے جیڑہانی بُنجل بوئگ ءِ سبب حکومت ءِ بلوچی ءِ نیمگا دلگوش نہ دیگ اِنت۔ دومی جیڑہ بلوچی کوّاس ءُ دانشورانی یک ءُ تپّاک نہ بوئگ اِنت۔ (نوں اے دگہ گپّے کہ بلوچانی گوٛرا ہمے مردم کوّاس ءُ دانشور گوٛشگ بنت آ داں چے حدّ ءَ دانشوری ءِ Definition ءِ ردا کاینت ءُ بلوچانی حقّی ئیں دانشور چینچک اَنت) ہرکس گوٛشیت من نہ گوٛشتگ ہِلار نہ اِنت۔ بلوچانی زبان ءُ لبزانکی یکّیں ادارہ بلوچی اکیڈمی کوئٹہ اِنت کہ ایش ہم جنجالانی آماچ اِنت ۔ ہر روچ فنڈ ءُ زرّ کم کنگ بنت۔ بلوچستان ءِ اے دگہ ادارہ کہ پہ بلوچی ءَ کار کنگ ءِ واہگ دار انت آہاں حکومت ءِ کمک ءُ سپورٹ گون نہ اِنت۔ اے وڑیں جاوراں بلوچی ءِ جیڑہاں کئے کم بہ کنت ۔ بلوچانی لوٹ اِنت کہ بلوچی چہ پرائمری اسکول ءَ وانینگ بہ بیت۔ داں کہ بلوچستان ءِ زہگ وتی ماتی زبان ءَ ونت ءُ دربرت بہ کن اَنت ۔ حکومت گوش نہ سُرینیت۔ بلوچانی واہگ اِنت کہ حکومت بلوچی زبان ءِ زبانزانتی جیڑہانی گیش ءُ گیوار ءَ لینگویج اتھارٹی ئے جوڑ بہ کنت۔ حکومت ءَ سُدّ پِر نیست۔ بلوچانی واہگ اِنت کہ بلوچانی شاعر ، نبشتہ کار ءُ کوّاس ءُ زانتکار مالی ءُ معاشی صورت ءَ کمک دیگ بہ بنت ، کار ءُ روزگار یا ادارہانی تہا ہوار کنگ یا اسکالرشپس دیگ بہ بنت ۔ حکومت گوش نہ سُرینیت۔ یک سرزمینے کہ نام ئے بلوچستان اِنت ، اودا نشتگیں مردم بلوچ گوٛشگ بنت ، ہما سرزمین ءِ حاکم ءُ واکدارانی حکومت ءِ نام بہ بیت بلوچستان حکومت ءُ بلوچستان حکومت ءَ بلوچانی زبان ءِ غم پِر مہ بیت گُڑا بلوچی زبان چون جیڑہانی بنجل نہ بیت۔
