ناگمانگوں تو دُچارکپگءَ رند من زانت کہ کِشک ہم منزل یے، اگن تو ہم سفر بہ بئے!
بلے تئی مِہرءِ ساچانءَ زِیتّ بُرّت۔ چہ تو رند من پدا ہما مسافراں کہ جلیں نیمروچءَ سیہ ڈَنّیءَ روان اِنت ءُ مَہپریں دمانیءِ پُٹّہے ہم نہ گْواہیت۔ تَپتگیں دل جست کنت آ کجام نوبت اِنت کہ وتی نوداں پہ من شلیت۔ دَم بُرتگیں گام گُشنت آ گْوستہ، بلے رَہچاریں دیدگانی حیالءَ انگت دیما اِنت۔ پمیشا من تبدءُ لوارانی تہا جُنزاناں۔ ہما من، ہما سیہ ڈَنّ، ءُ ہما ٹاکیں نیمروچءِ سفر۔ ہاں، یک فرقے ہست۔ نی من اے سفرءَ ایوک نیاں۔۔۔۔۔ ہرگٗولاپ تئی تْرانگءَ گیج اِیت!