لبزانک ءُ وانوک

شونکار درانگاز

لبزانک ءِ واستہ وانگ المی انت ۔ پہ ہما مردم ءَ ہم کہ آ لبزانک نبشتہ کنت ۔ پہ ہما مردم ءَ ہم کہ لبزانک وانگ ءُ وتی ارواہ ءَ تاہیر دیگ لوٹیت ۔ ہما ساچشت کار کہ لبزانک نبشتہ کنگ لوٹیت آئی ءَ سک باز وانگی اِنت ۔ پہ آئی ءَ اے گپ ءِ زانگ المی انت کہ زانت ءُ سما یا شعور یک طبقہ یا مچی ءِ مشاہدہ ءَ دروشم نہ زوریت ۔ اے گوں  بازیں دور ءُ نوبتانی چاگردی ءُ دودمانی ، تبزانشتی ءُ ذہنی ، سیاسی مئیل ءُ رحجانانی تپاسگ ءُ زانگ ءَ ودی بیت ۔گوستگیں باریگ ءِ دور ءُ نوبتانی زانگ ءَ راجدپتر ، تبزانشتی  ءُ ذہنی چست ءُ ایرانی ہاترا نفسیات ءُ سیاسی ءُ چاگردی میلانی تپاسگ ءَ فلسفہ ءِ گیش ءَ چہ گیش وانگ ہژدری اِنت ءُوتی تجربہ ءُ کتہ کاریاں نبشتہ کنگ ءِ ہاترا لبزانک ءِ تکنیک ءُ رہبنداں گیش ءَ چہ گیش وانگ المی اِنت۔ لبزانک ءِ ہمے قدر ءُ کیلو انت کہ ایشانی ساچشت کارے ءِ گورا بوہگ المی اِنت۔

یک سرجمیں ازمکارے ہما انت کہ وتی جند ءِ ذات ءَ دربارت ، پدا وتی تہا وتی عہد ءُ زندگی ءِ جوش ءُ جوزگاں ماریت ءُ آئی ءِ زانت ءُ زانگ ءِ تہا گوستگیں زمانگ ءِ دربرتگیں سنچ ءُ سما ءِ ارواہ مان بہ بیت ۔ ہمے رنگیں ساچشت کار چشیں لبزانک ساچ ات کنت کہ زندگی ءِ زیبائی ءُ وتی دور ءُ نوبت ءِ لوٹاں پورا کت بہ کنت ۔ ہمے وڑیں لبزانک ابدمان بیت ۔اے گپ ہمنچو رند ءَ گشگ بوتگ کہ پدا ایشی ءِ پرلیسگ گپ ءِ تام ءَ بارت کہ لبزانک تہا حیالی گپ ءُ کسہ نہ انت لبزانک وَ زندگی ءِ آدینک انت ۔ پمیشکہ پہ یک جوانیں ساچشت کارے ءَ المی انت کہ مزنیں حیال ءُ تخیل ءِ واہند بوہگ ءِ ہواری ءَ آئی ءِ وانگ ءُ زانگ ءِ شہار پراہ ءُ شاہیگان بہ بیت ۔