بلوچی دستونک ءَ بلوچی زبان ءِ ذگریں دروشم ءَ ہوار کنگ ءَ مُراد ساحرءِ مزنیں دستے مان انت۔ آ 1927ءَ بل نگور ءِ میتگ شے سیچی ءَ ودی بوتگ ۔ آئیءِ پت ءِ نام مُلا رحمت بوتگ ۔ آئیءَ وتی بنداتی وانگ ءُ زانگ چہ وتی کماش ءَ دربرتگ ۔ پدا وھدے آئیءَ کہول ءَ چہ نگورءَ لڈّ ءُ بار کتگ ءُ اتکگ انت کوہنیں گولیمار کراچی ءَ جاہمنند بوتگ انت گڈا آئیءَ سندھی میڈیم اسکولے ءَ ونتگ ۔ سندھی شاعر شاہ عبدالطیف بھٹائی ءِ شعراں چہ اثرمند بوھگ ءِ سبب ءَ آئیءَ لبزانک ءِ نیمگا دلگوش گور کتگ ۔ مراد ساحرءِ شاعری ءَ وطن دوستی ، چاگردءِ اڑ ءُ جنجال ، شُد ءُ گژن ءُ مہرءُ دوستی ءَ سرحال کنگ بوتگ انت ۔ مراد ساحرءَ شاعریءَ ابید آزمانک ہم نبشتہ کتگ ءُ آئیءِ آزمانک ’’گرمیں ساہگ ‘‘، ’’ گرئند‘‘ بلوچی ءِ جوانیں آزمانکاں شمار بنت۔ مُراد ساحر ءِ شاعری ءِ 4کتاب ’’ پاہار‘‘، ’’ چیہال‘‘ ، ’’ زرءِ مُروارد‘‘ ، ’’ بشکن منی پریاتاں ‘‘ ءُ آزمانکانی یک گونڈیں کتابے ’’ گرمیں ساہگ ‘‘ چاپ ءُ شنگ بوتگ انت ۔ مُراد ساحر 19ستمبر1998ءَ چہ اے دُنیا ءَ رپتگ ۔