بلوچی لبزانک ءَ بنداتی دور ءَ بازیں گدار نبیسگ نہ بیتگ بلے وھد ءِ ھمراھی ءَ نبشتہ کارانی نگاہ ءَ گدار ءِ ارزشت ودیتگ، مرچاں مارا بلوچی لبزانک ءَ بازیں گدار دست کپ ایت بلے بلوچی گدار ءِ ازمی کد ءُ کساس انگت زانگ نہ بیت ءُ بلوچی ءِ تہ ءَ چوشیں رد ءُ بند تنیگا سرجمیں دروشمے ءَ دیم ءَ نیاتکگ مردم زانت بکنت کہ “ڈاکٹر فضل خالق” ءِ گدار “ہر ساعت چکاس” 2005 ءَ بلوچی اکیڈمی کوئٹہ ءِ نیمگ ءَ چاپ بیتگ چنچومی گدار انت۔
“ہر ساعت چکاس” بیانیہ تکنیک ءِ گدارے 272 تاکدیم ءَ انت۔
کسہ ءِ بنکی کارست احمد انت کہ آئی ءِ کہول ءِ جیڑہ ھما وھد ءَ گیش بنت کہ آئی ءِ پت دگہ زالے ءَ گوں سور کنت ءُ پد ءَ احمد ءِ تانی ھچ ھیال ءَ نداریت ءُ لوگ ءِ ھم در کنت، اے گرانیں ساھت ءَ ھیبتان، احمد تاناں وتی لوگ ءَ جاگہ دنت ءُ کوچگ ءَ بارت۔
احمد ءِ سنگت مزار نہ بس آئی ءَ ھرچ وڑیں مدت کنت بلکیں آئی ءِ واستا ڈرائیوری کارے ھم چار ایت، آئی ءِ کر ءَ سارہ ھم کار ءَ بیت وتی برات ءِ وانگ ءِ ھرچ ءِ کشگ ءَ پوریاگری کنت۔
سارہ پوریاگری ءِ دروشم ءَ احمد ءِ کر ءَ کار ءَ آرگ ءُ آئی ءِ دوستار کنگ ھاسیں امکاناتے نہ ات۔
وارث ءِ کارست ،گدار ءِ تہ ءَ بلوچی سوت کونیں کسہ ءُ شئیراں پٹ ءُ پول کنت ءُ ایشاں پہ چاپگ ءَ چاپکارانی سر ءَ دیم دنت۔
کسہ ءِ تہ ءَ سسپنس ھما وھد ءَ کیت کہ احمد کوچگ ءَ ھیبتان ءِ جنک ءِ سور ءَ روت آئی ءِ جنک ءِ واستار وتی سور ءَ بجیت گڑا مات احمد ءَ پہ سور ءَ لاچار کنت۔
کسہ ءِ یک دروشمے چاگرد ءِ جیڑہ انت پیش داشتگ انت کہ کادر لھتے مردماں گوں نشہ ءِ بیپار کنت ءُ چک دز ایت ءُ کلیجاں بہا کنت۔
کادر ءِ درستیں سُر ءُ پرانی زانگ ءِ واستا آ پیسلہ کناں وارث کادر تانی کر ءَ بہ بیت مارا آیانی ھرچ وڑیں رازاں آشنا بہ کنت۔
گڈی ءَ کادر سھی بیت کہ مئے رازاں وارث پاشک کنگ ءَ انت گڑا وارث ءَ بازیں لٹ ءُ کٹ کن انت۔ وارث پدا تچیت اسپتال ءَ روت کادر ھمود ءَ روت ءُ آئی ءَ جنت۔
“ھسپتال ءِ سر بوہگ ءَ رند آئی ءَ ہما جاگہ درگیتک کہ وارث ہمود ءَ ات۔ آئی ءَ وتی پستول ءِ ششیں تیر وارث ءِ سرا خرچ کت انت”
ڈاکٹر فضل خالق ءِ درشانداب سک ریچوک ءُ واناک انت بلے باز جاہ ءَ اردو زدگ انت۔
“آئی ءَ ششیں تیر خرچ کت انت”
“آئی ءَ اضافی مضمون ءِ حساب ءَ ہم امتحان داتگ ات”
“آئی ءِ خیالانی قطار پرشت ءُ آ را شکاریانی سرا سک باز نفرت بوت”
“تھانیدار ءُ محرر ءِ سر ءُ سوج کتگیں ڈرامہ ءِ اولی قسط سوب مندی ءَ بازار ءَ ھلگ ءَ ات”
“تھانیدار ءَ گوں مزنیں احسانے ءَ وتی سر ءَ را جھٹکہ دیان ءَ گشت”
“کاغزی کاروائی ءَ بروبر بہ کناں ءُ آزات بہ کناں”
چشیں گالرداں گدار سر ریچ انت۔
گدار ءِ واکہاتانی رد ءُ بند جوان انت ءُ گدار ءِ تہ ءَ باز جاہ ءَ جوانیں ندارگ کشی وانوک ءِ دل ءَ ھم ایر کپ انت۔
بلے ساچستی ھساب ءَ گدار انچو مزن نہ انت ءُ کادر تانی چاگردی جیڑہ ءُ سُر ءُ پراں انچو گمان بیت کہ تامر ءِ دروشمیں سبکیں واکہات دیم ءَ آرگ بیتگ ۔بازیں جاہ ءَ گدار ءِ کسہ دل ءَ ایر کپ ات بلے زبان ءُ بیان ءُ کارست نگاری گدار ءِ تہ ءَ ھاس نہ اَنت۔