مشکل انت تو بیائے پدا مئے گورءَ ، مارا وھد ءَ جتگ
ھچ گناہ ءُ میار نیست دلبر ترا ، مارا وھد ءَ جتگ
پیشگیں نوبتانی مگیج ترانگ ءَ ، دل نہ سگّیت منی
گپ مجن ھچ مگش نی چد و دیمترا ، مارا وھد ءَ جتگ
نہ محبت نہ دوستی نہ مہر ءُ وفا ، ھچ نہ منتگ اَدا
گپ مجن زندگی بس چداں چہ درا ، مارا وھد ءَ جتگ
وھد ءُ بے وھد اتک ئے منی ھاترءَ ، آدگہ روچ اتاں
نی میاءُ مہ نند تو منی رہسرءَ ، مارا وھد ءَ جتگ
چونیا وھد ءِ گلّہ کنگ شرنہ انت ، حال کسّءَ مدئے
بس بگش تہنا ظفراکبر ءَ ، مارا وھد ءَ جتگ