جیڑگی گپّ

شونکار درانگاز

یک سرجمیں ازمکارے ہما انت کہ وتی جند ءِ ذات ءَ دربارت ، پدا وتی تہا وتی عہد ءُ زندگی ءِ جوش ءُ جوزگاں ماریت ءُ آئی ءِ زانت ءُ زانگ ءِ تہا گوستگیں زمانگ ءِ دربرتگیں سنچ ءُ سما ءِ ارواہ مان بہ بیت ۔ ہمے رنگیں ساچشت کار چشیں لبزانک ساچ ات کنت کہ زندگی ءِ زیبائی ءُ وتی دور ءُ نوبت ءِ لوٹاں پورا کت بہ کنت ۔ ہمے وڑیں لبزانک ابدمان بیت ۔اے گپ ہمنچو رند ءَ گشگ بوتگ کہ پدا ایشی ءِ پرلیسگ گپ ءِ تام ءَ بارت کہ لبزانک تہا حیالی گپ ءُ کسہ نہ انت لبزانک وَ زندگی ءِ آدینک انت ۔ پمیشکہ پہ یک جوانیں ساچشت کارے ءَ المی انت کہ مزنیں حیال ءُ تخیل ءِ واہند بوہگ ءِ ہواری ءَ آئی ءِ وانگ ءُ زانگ ءِ شہار پراہ ءُ شاہیگان بہ بیت ۔

ما ہما چاگرد ءَ نشتگیں دزگٹی ءُ امروز ءِ ہل ہل ءُ تچ ءُ تاک بازانت ، مئے چاگرد ءَساچشت کار بازیں نگیگیانی آماچ انت ۔ امروز ءِ غم ءُ لال ءِ حیالاں مانگیش اتگ ، نبشتہ کار جاہے وانگ ءِ واک نہ کنگ ءِ گپ ءَ جنت ءُ جاہے ہمے زنگ ءَ جنت کہ آئی ءِ گورا پہ وانگ ءَ وھد نیست ۔اے وڑیں ساچشت کار ءُ نبشتہ کار  چے نبشتہ کنت ؟ آئی ءِ ساچشتانی بستار چے بیت ؟ آئی نبشتانک لبزانک ءُ چاگرد ءِ کجام درد ءَ ور انت ۔  اے  جیڑگی گپے۔۔۔۔!