بہر زوروک
ماہ گُل : شانزدہ سالیگیں کِنشکے (جِنکّے) ءُ میر پُردل خان ءِ کج (محبوبہ) انت
میر پُردل خان : میر مزار خان ءِ بچّ انت۔ وتی ہوس ءِ پیلو کنگ ءِ حاطر ءَ ماہ گل ءَ وتی تلک ءِ تہا پاسینیت۔ عمر سی ءُ پنچ سال انت۔
مُروارد: میر پُردل خان ءِ ماہ گل ءَ چہ ساری ئیں شکار بوتہ۔ بیست سال ءِ بیت۔
واجہ دلمراد: یک سردارے کہ ناجائزیں کار کنت ءُ کراچی ءِ تہا آئی ءِ بازیں چنڈو خانہ ءُ قحبہ خانہ انت۔
(بشانگ چست بیت)
(یک براہ داریں کوٹی ءِ تہا یک جنکے نشتہ ءُچمّ ئِے ارسیگ انت ءُ وزّتے ءَ کپتہ۔۔۔۔ آ پاد کیت ، دروازگ ءِ نیمگ ءَ رئوتءُ وتا وت گُرنڈیت)
جنک: منی پُردل خان! اے تئی پنچمی روچ انت کہ تو نہ زانے ادا من چوناں، منی دل چون انت!!! تو وت گُشت کہ راہ حراب انت۔ من ءَ ہم گوں وت ءَ بہ بُرتینے۔ بِل کہ من ہم گوں تو مُرتیناں۔۔۔ بلے منی دل گُشَگ ءَ انت کہ تو زندگئے۔ من ہم چدّاں رواں، ترا کنڈ کنڈ ءَ چاراں۔۔۔ داں ترا نہ گنداں آرام ءَ نہ ننداں۔۔۔ آہ۔۔
(دروازگ ءَ چہ دَر رئوت۔ ہما پیم ءَ وزنی ات۔ ہچّ ءَ سہی نہ انت بلئے یک توارے آئی ءَ جہہ سرّینت۔ حیران بیت کہ اے جنین کئے انت کہ ادا آئی ءَ توار جنگ ءَانت۔ چاریت کہ یکے اوشتاتہ۔ شرّی ءَ چاریت ءُ پُرست ئے)
ماہ گُل : تو مُروارد نہ ئے ؟
مُروارد : ہؤ من اوں۔۔۔ بلے تو ادا چوں؟ بلکہ ترا ہمے شومّیں پُردل ءَ آئورتہ؟ اُف اللہ ۔
ماہ گُل : مُروارد تو منی پُردل جان ءَ شومّ گُشئے ؟
مُروارد: خیر اے گپّاں یلہ دئے۔ تو ادا چوں اَتکے؟
ماہ گُل : اے گپاں یلہ دئے۔ تو اے دگہ حبراں دے؟
مُروارد: بچار تو دگہ حبر مکن۔۔ بہ گُش کہ تو چوں ادا ئے؟ پُردل ۔۔۔۔
ماہ گُل : تو چوں زانت کہ منا پُردل جان ءَ آئورتہ۔۔۔ بلے تو چوں ادائے ؟
مُروارد: من دگہ نزاناں ۔ ترا پُردل ءَ چوں آئورتہ، مدان مدان ءَ حبر کن زوت۔
ماہ گُل : پرچے زاناں؟
مُروارد: تو اے جُست ءُ پرس ءَ بل۔ منی جواب ءَ بدئے۔
ماہ گُل : مروچی پنچ روچ انت آئی ءَ گُشتہ ’’ من چار روچ ءِ تہا کایاں؟ ‘‘۔ بلئے انگہ نیاحتہ۔ تو سہی نئے ؟
مُروارد: من اے جُست ءَ کناں کہ آ کجا شُتہ؟ من گُشاں ترا آئی ءَ ادا چوں آئورتہ ؟ گڈا ترا من گُشاں کہ پُردل کجا انت ؟
ماہ گُل : شرّیں بہ گُش نا کجا انت ؟
مُروارد : نا نا۔۔ ۔ تو یک برے بہ گُش!!!
ماہ گُل : گُڈا تو من ءَ گُشئے؟
مُروارد: ہؤ قول انت۔
ماہ گُل : (یک سردے آہے کشّیت ءُ گُشیت) شما وت سہی ات کہ ملک ءَ چونیں ڈکّالے کپتہ ۔ منی پس ہما ڈکّال ءِ گواچی بوت انت بلے مردم گُشنت کہ آئی ءَ پردل خان ءَ زہر داتہ یا سحر کنائینتہ۔ منی دل ہمے حبر ءَ ہچ نہ منّیت ءُ میر پُردل جان ہچبر چوش نہ کنت۔
مُروارد: ہاں ہاں۔۔۔۔ تئی پس چرے دنیا ءَ شُت انت۔ بلے منی سر پر نہ بیت کہ یکے سردار ءِ گوٛر ءَ نوکر بہ بیت ءُ ڈکّال ءِ سوٛب ءَ بہ مِریت۔۔۔۔ او شرّ انت مردم اے ڈول ءَ چے ءَ گُشنت۔
ماہ گُل : اے حبر تئی راست انت کہ یکے سردار ءِ نوکر بیت ءُ ڈکّال ءِ سوٛب ءَ بہ مریت بلے سردار ءِ چے گُناہ انت۔ ہمروچ اُشترانی بَگ اچ برنج ءُ گلّہ ءَ بار کنگءُ دیم دیگ بوتگ انت۔ چُشیں روچ نہ بوتہ کہ اُشترانی بگ چِدا در میاینت ءُ مردمانی چماں ارسی مہ کن انت۔من پُردل جان ءَ جُست کُتہ ۔ آئی ءَ اے جواب داتہ کہ ’’ اے سرکار ءِ حکم انت ءُ اے گَلّہ ہمائی ءِ گوٛرا روانت ‘‘۔ نوں تو بہ گُش سردار ءِ چے گناہ انت ءُ مردم منی پس ءِ حدامرزی ءِ باروا ہمے حاطر ءَ چوش گشنت (سر ءَ جہل کنت) پُردل جان ءَ منا سک دوست داشتہ ءُ آمنا ہم دوست بوتہ۔ (سردیں آہے کشّیت) آئی ءَ پہ مئے عاروس ءَ حدامرزی ءَ گُشتگے بلے آئی ءَ نہ منّیتگ ات ءُ دگہ حبر ہم نہ کُتہ۔ یک روچے آئی ءَ گُشت کہ ’’ نوں ما چِدا در بہ رویں پرچیکہ ادا ڈکّال مارا گار کنت ءُ کراچی ءَ رویں ءُ پوریات کنیں ، لاپ ءَ کشّیں ‘‘۔ بلے دومی روچ ءَ گوں ملکموت ءَ ہمباز بوت۔۔۔ پمیشکا مردم گُشنت کہ حدا مرزی پُردل خان ءِ عاروس منی گوما بوتہ ۔ ہمے حاطرا آئی ءَ زہر داتہ کُشتگ ئے یا سحر کنائینتہ، بلے منی دل زانت کہ پُردل جان چوش نہ کنت۔ حدا مرزی ءِ رنج ءَ منی ماس ءَ ہم (چم ارس ءَ پُرّ بنت) ملکموت ء نوار جت ءُ ہمراہ بوت شُت۔
مُروارد : تئی ماس ہم مُرت؟ اُف ۔۔۔۔ شرّپداریں ماسے اَت۔
ماہ گُل : باز روچ ءَ رند یک شپے ۔(ادا ماہ گُل ءِ درستیں احوال یک خیالی ندارگے ءِ تہا پیش دارگ بنت کہ ’’ ہما شپی ‘‘ چے بُوت ءُ ہما شپ ءِ درائیں کسّہ باقاعدہ اسٹیج ءِ سر ءَ پیشدارگ بیت)
(خیالی ندارگ)
(اے نیمگ ءُ آ نیمگ ءَ کوہ انت، نیام ءَ شیپے۔ شیپ ءِ گوٛرا یک مردے ءُ جنینے نشتگ انت ، ماہکانی ءِ شپ انت۔ شیپ ءِ آپ ءَ تہا آسمان ءِ اوت جاکیت (دَرا اِنت) کہ یک نیمگے ماہ انت ءُ استاراں۔ گُشئے زانا آئی ءَ ہمباز کنگ ءِ پکر ءَ انت۔ جنین ’’ آہ ‘‘ کشّیت ءُ پاد کیت تہ مردم ہم پاد کیت۔ دوئینانی دیم ہمینگو بیت تہ جاکاینت کہ یکے ماہ گُل انت ءُ دومی دگہ یک ورنائے )
ماہ گُل : منی پُردل جان ہرچ پیم تو گُشئے۔
ُپُردل خان : ماہ گُل! اے شہر ءِ تہا تو وتی مٹّ وتے۔ پریشتگے ئے پریشتگ (فرشتہ) ، پریانی سروک۔۔۔ اے ماہ چونیں مبارکیں ماہے؟ قلندر ءِمیڑہ انت۔ من گُشاں تو قلندر ءِ میڑہ ندیستہ۔۔۔ منی گوٛشگ ءِ ہم ضلورت نہ انت تو وت گندئے کہ قلندر قلندر اِنت۔ ماہ گُل باندا ما ءُ تو، ءُ یک دو دگہ گلام چریدا اشترانی سر ءَ پسنی ءَ رویں ءُ چودا کراچی ءَ ءُ چہ کراچی ءَ قلندر ءِ سر ءَ۔۔۔۔ لعل شہباز ءِ سرا۔۔۔۔۔۔
(پدا ہما اولی ندارگ)
ماہ گُل: پدا ما ہمیدا لعل شہباز ءِ سرا اَتکیں ءُ ہمے واجہ دلمراد ءِ آدگہ ماڑی ءَ نشتیں۔ مئے گوٛر ءَ یک ملنگے ہم است ات۔ آئی ہمک روچ مارا صحب ءَ بیگاہ ءَ سبز چاہ داتگ ات۔ یک روچے بیگاہ ءِ وہد ءَ آئی ءَ منا سبز چاہ دات تہ من نان ءِ ورگ ءَ چہ رند شپ ءَ سک بے سماہ بوتاں۔ من نہ زانت دنیائے است یا نیست ۔۔۔۔ بلے وہدے من صحب ءَ آگاہ بوتاں تہ ۔۔۔۔۔ منی ہڈ ءُ بند درد کنگ ءَ اتنت۔ من چاراں جان ءُ نپاد دراہ ءَ حونین انت۔ میڑہ ءَ چہ یک دو شپ پیسر ءُ یک ءُ دو شپ رند ہنچش بُوت۔۔۔۔ بلے من پُردل جان ءَ گوں حبر کت نہ کتہ۔ میڑہ ہلاس بوت ، دو روچ رند ہما ملنگ پیر سنجر شاہ روگی اَت۔ تہ پُردل جان ءَ آئی ءَ را باز زرّ دات ءُ گُشتئے کہ باندا آ ہم ہما پیر ءِ سر ءَ رئوت۔ ملنگ ءَ اے اِشکُت تہ آئی ءَ زور کُت کہ ہمائی ءِ گوں بہ رواِت۔ پُردل جان ءَ منّت ءُ گُشتے کہ آ ہم رئوت۔ بلے منا گُشتے کہ ’’ تو ہمیدا دلمراد ءِ گوٛرا بہ نند ‘‘۔ من نہ منّ اِت ءُ ڈکّ کُتن کہ منا برگوں بلے آئی ءَ گُشت کہ اے راہ سک حراب انت۔۔۔ دومی حبر ایش انت کہ آ پیریں زال نیلیت کہ ’’ دلمراد ءِ گوٛرا بہ نند، آ اسپیت پوشیں انسانے ءُ اے شہر ءِ یکیں بلوچ سردار انت ءُ باز لائقیں مردے ‘‘۔من مجبور بوتن ءُ ایدا نشتگن، بلے انگت آ نیاحتہ۔ مرچی پنچ روچ بوت ءُ وشّ انت۔
مُروارد! نوں تو بہ گُش کہ آ کجا انت ؟
مُروارد: (یک سردیں آہے کشّیت) ماہ گُل آنوں پدا نئیت۔ آنوں مکران ءَ ہم سر بُوتہ۔
ماہ گُل : مُروارد! چُشیں حبر مکن، آضلور کیت۔ خدائے کاریت۔
مُروارد : من انچیں گپ نہ جنین۔ آئی ءَ ترا ادا بہا کُتہ۔
ماہ گُل : منی پُردل جان ءَ چوش مہ گُش، آ انچیں کار کنت زانا ؟ نہ نہ۔۔۔
مُروارد : منا چہ ساری ءَ آئی ءَ صدانی جنک آرتہ ءُ بہا کُتہ۔ پدا من ءَ آئورت ءُ بہا کت ءُ نوں تئی زندگی حراب۔۔۔۔ من ءَ ہم آئی ءَ انچش پہ پلملی آئورتہ۔ منا شاری ءَ گُشتہ کہ ترا بہا اش کُتہ، من انچش تئی پیم ءَ نہ منتّہ۔ بلے لہتیں روچ ءَ رند تہ وت زانے کہ منی حبر راست انت۔ من اِشکُتہ کہ آ ترا کراچی ءَ دیم دینت۔ اودا ترا چرس بہا کنگ ہم کپی ءُ وتی دامن ہم پولنگ۔۔۔۔۔ (کمکے پُس پُس کنت ) دلمراد ءِ اُود چنڈو خانہ ءُ قحبگ خانہ انت۔آیانی مستر اُودا اَتک انت ءُ کراچی ءِ چبکّانی (غنڈہ آنی) مستر انت۔ اُفّ! پُردل آہِ غریبان قہر خدا۔
ماہ گُل : چرس بہا کنگی انت؟ ۔۔۔۔ دامن پولنگ۔ گڈا مروارد شرّ نہ انت کہ ما بہ تچیں؟
(اناگاہ ءَ مردے کیت ءُ ایشانی دیما اوشتیت)
دلمراد : ہا ہا ہا ۔۔۔۔۔ (ٹہکگے جنت ) راہ راست پرچے نیست ؟
نیست بہ رئوں نا (ماہ گُل ءِ دست ءَ چہ زہر ءَ تاب دنت )۔ مُپت ءَ چہ نیاحتگے۔ آواجہ ءَ زرّ زُرتہ زُر ۔۔۔۔ اِشکتئے ؟
(ماہ گُل زرد ءُ شونز ترّیت۔ مروارد وتارا یک کشے ءَ کنت )
(بشانگ قرار قرار ءَ کپیت)
اے کسمانک چہ ہیبتان عمر ءِ کتاب کسمانک ءُ بلوچی کسمانک ءَ زُرتگ