بابل ءِ پت! سُھبی بیچارگیں زر ملک تئی گندگ ءَ اتکگ- بی بی شہناز ءَ میر زرداد ءِ لوگ ءَ پترگ ءَ ھال دات-
سَک بزگ انت بیچارگ-،،
کئے بزگ انت-میرزرداد کہ نوکی گوں گوں تکانسری ءَ چہ کارگس ءَ آتکگ ات- پسّہ دات-
ھمے زرملک وار-
کجام زرملک- میر ءَ پدا پول کت-
ہمساھگ نہ انت؟! نیکو ءِ جنوزام-
نیکو ءِ جنوزام!!!؟
وئے چون بابل ءِ پت! زرملک ءُ نیکو ءَ نہ زانئے- تئی بانل ءِ مُروارد ءُ شیرباز ءِ دینبوگ کئے انت؟ سیمی لوگ کئیگ انت- تو وت باز رنداں گُشتگ کہ نیکو تئی کسانی ءِ سنگت بوتگ- مرچی سرکاری بنگلو ءَ نشتگ ئے غریبیں ھمساہگاں بیھال ئے-
ھو…ھو…! اے بدبھتیں نیکو ءِ جنوزام…ھو چیا آتکگ ات زاناں ….
واری ءَ آؤرتگ ات بیچارگ…بی بی ءَ پسّہ دات-
سَدے کپے دست ءَ داتیں…تو من ءَ ماں بندان بکن ئے-
وئے! آ مئے ہمساھگ انت..تئی کسانی ءِ سنگت ءِ جنوزام انت انگہ تو گشئے من نزان ئےِ ….
بازوھداں مردم ءِ ھیال اے نیمگا نہ روت….وامے شامے ءَ آتکگ ات-
وام یا پنڈگ ءَ نیاتکگ ات…بی بی کمیں وتی مورک مجینت-
گڑا چیا آتکگ ات….میر زرداد ھم کمیں زھر گپت-
آتکگ ات گشیت واجہ ءِ کارگس ءَ یک کاسد کارے ءِ نوکری ءِ جاگہ ہورک انت منی بچ زباد ءَ بدنت ئےِ کہ بیروزگار انت- برؤت مزنیں اگدھے بچاریت..تاسیلداری،تانیداری ءِ اگدہ ءِ مردم کاسد کار چون بیت- پدا سائنس ونتگ ئےِ پرائی نوکری ءِ چے کمی انت،اے بچک وت وَ ٹپّرے کار گساں نہ روت درخاست نہ دنت…. ادا دیستگ ئےِ کہ سرکاری ءِ نوکری یک ھمساہگ ءِ کارگس ءَ ھست انت ءُ بے جکانسری ءَ رسیت بس وتی مات ءَ را تئی لوگ ءَ دیم ئےِ داتگ…میر وتی لوگ بانک ءَ را پہ سرپدی درّائینت- اے بچک وت نالائکے…
ھر چیز انت بلے غریبے…غریب ءِ ھاتر ءَ ھمے کسانیں نوکری ھم شرانت تو ئےِ بدئے….رند ءَ آ بزانت آئی کار…..
بلے بھتاور ترا سما نیست کہ پرے نوکری ءَ من ءَ چینکہ ءُ چونیں چونیں مردماں پہ کئے کئے گشتگ…..
بلے ھرچیز انت ترا زرملک ءِ بچ ءَ را اے نوکری دئیگی انت…من ءَ باندات پدا پہ زرملک ءَ کپیت- تو وَ سہی یے کہ من ءَ سے ماہءِ امیت واری ہست…
ڈاکٹر بازانت…نوں زرملک ءُ درملک ءَ کئے جست کنت…..
ائے…سوچ وتی ڈاکٹراں…منی دینبوگ ھمے زرملک انت…من ترا انّوں گشگ آں…شرانت…چار پیسہ گیشتر بدے ءِ ….اے وَ جنگی گپے نہ انت کہ تو مرچی پہ جنگ ءَ لانک بستگ ئے …
من پہ جنگ ءَ لانک نہ بستگ توئے کہ مرچاں مگرور ئے وتی ھمساہگ ءُ آزیزاں پجّہ نیار ئے…چہ دگر ءِ چک ءَ زرمک ءِ چک ءَ را نانے رسیت،ترا ھدا بے سواب نہ کنت ءُ منی ھزار کار ءَ کئیت-
تو وَ جاھلے ءِ ،، ترا چی بگوشاں……
چے گشئے من ءَ تو…من کجام جاھلی کتگ…
تو جاھلے نئے منی نوکری ءِ دمب ءَ کپتگ ئے-
وئے شریں مُسیبتے با…تئی نوکری زاناں گج ءِ لھم ءَ بستگ …نوکری نہ روت…نوں میر زرداد زھرگپت….من ءَ منی وزیر گشیت کہ اے نوکری ءَ ائیدو ءِ پت کریمو ءَ بدئے…تو گشئے زرملک ءِ بچ ءَ بہ زور آں…
وئے کجام ائیدو…بی بی شہناز پرچکے وتی مرد ءَ را دات…اے ائیدو دکاندارے لاپ ءُ لانک انت ءُ پدا آئی پت ءَ وَ نوں قبر توار ءَ انت….چشیں ناٹاپیں کار ءَ کن ات شما باریں….
وزیر ءِ ھاترا سدے ووٹ ائیدو ءَ داتگ،میر زرداد پسّہ دات ءُ زھر ءَ زھر دومی گس ءَ پترت….
نوں آرا وتی کارگس ءِ ندارگ ءَ چپ ءُ چاگرد کت…نوکری ءِ ھاترا دو سد ءُ سی ءُ ھپت امیدوار آتکگ ات کہ ماں ایشاں ورنا،پیر،ناوانندگ،کم وانندگ،بازوانندگ ءَ ابید چل ءُ نوہ جنیادم ءُ جنکّ ھوار اتنت- اے نوکری ءَ ھما سبزارنگیں بارگ بندیں ورنا ءَ بدنت کہ بیچارگ ءَ BSC دربرتگ ات بلے بے وارسی ءَ کس آرا نوکری ءَ دیگ ءَ نہ ات ءُ آ بیزوگاری ءِ سوب ءَ اے کسانُکیں نوکری ءِ ھاترا اتکگ ات….نوکری ءَ آؤکین امیدواران ءَ چکاس تہ چرے ورنا ءَ باز متاسر بوتگ ات-
تئی نام کئے انت…
َ
زباد…
تئی پت ءِ نام ….
جی….نیکو…
چنکہ ونتگ ئے ….
بچک ءَ یکرندے میرداد ءِ چمانی نیمگا چارت ءُ پدا وتی سر جہل کت ءُ کلہے پسّہ دات جی BSC اولی درجگ ءَ در برتگ….
BSC اولی درجگ ءَ در برتگ….
سئئیں اگدہ دارانی چم یکپارگی پرے بچک ءَ چست بوتنت….اگدہ داراں وتی وتی دیم ءِ کاگدان ءَ چست ءُ ایر کت ءُ پدا یک اگدہ دارے ءَ چم چست کتنت ءُ درّائینت BSC اولی درجگ ءَ دربرتگ ءُ پرے کسانکیں نوکری ءَ تچان ءَ پیداک ئے….شریں منسبے شوھاز کن…
من باز شوھاز کتگ واجہ بلے….
بلے چے …بلے چے تو ماشاء اللہ وانندگ ءُ زانندگیں ورناھے ءِ ….دگہ ترا چے لوٹ ایت…
جی اے BSC ءِ ڈگری ایوکا منی درد ءَ نہ وارت….
دگہ چے تئی درد ءَ وارت….دگہ اوررسیئر ءُ ایس ڈی او ءِ اگدھے بچار- اے کسانکیں نوکری ءَ پہ بے چارگیں بے وانندھیں غریباں بل…من ءَ شپ کئیت شام نیست ءُ روچ کئیت سبارگ…..تو بگوش باریں ترا چی یے زلورت انت پہ اگدہے ءَ ….سیمی اگدہ دار ءَ پول کت….
من ءَ ….جی من ءَ وزیر ءُ گزیرے ءِ سفارش ءُ دگہ….
سفارش….!! مرچی جمہوریت ءِ وھد انت ….
وزیر ءُ گزیر ءِ سفارش ءِ رسگ کجام گرانیں کارے….
بلے…..زباد لوٹ ات کہ دگہ گپے بہ جنت میر زرداد چرآئی دپ ءَ گپ پُل ات-
بلے بلے ھچ نا…من ءَ پہل کن…. برو ترا اجازت انت…
ءُ پدا ھین ءِ تُرندیں شہمات ءَ میر زر داد ءِ سینگ ءَ توار کت…آ پہ ناگیگی چہ کرسی ءَ زوت زوت پداتک ءُ پہ لوگ ءَ رھادگ بوت-
ماھتاک بلوچی نومبر 1998