جنگ ءُ مِڑَگ

ڈاکٹر بیزن صبا

جنگ ھلاس بوت جرمناں فرانس گِپت۔ انچش کہ زوراکے نزورین ءَ لپاشان کنت ، ڈگار ءَ جنت۔ پیرس ، چہ اولی ریل گاڑی دیم پہ دراجیں سپرے ءَ رھادگ ات ۔ ملک ءِ نوکیں سیمسر ھند ساچگ بوتگ اتنت ۔ مساپر چہ ریل ، دریان ، ڈن سوتکگیں ڈگار ءُ دیاراں گون ابیتکیں دیدگاں چاران اتنت جرمن فوج ءِ سپاھیگ ، گون وتی سیاھیں ٹوپان ھلک لوگانی دپ ءَ پانگ اتنت ۔ وتی بیڑیانی کش گران پہ آرام نشتگ ءُ تچک ات انت۔ لھتے اسپانی سر ءَ سوار ات انت ۔انچو زاھر بوت آ اے سرڈگار ءِ مدامیگیں باشندہ انت ۔انچش کہ دیم ، روان بئے تیوگیں فوجی رجمنٹ گندگ ، کاھنت۔ اگاں ریل گاڑی ءِ گرندوکیں توار مہ بوتیں آوانی گرُگ نردگان زمین سر ءَ زرتگ ات۔۔۔ ھر نیمگ ءَ ڈکال ءُ ابیتکی ءَ وتی بانزل ایر داتگ اتنت ۔ ایم ڈیوبس ، ھم ھمے ریل گاڑی ءِ مساپر ات ۔ آ وتی چکانی چارگ ءَ روگ ات ، کہ اے دمان ءَ سوئزرلینڈ ، جھمنند ات انت ۔ کہ جنگ ءَ ساری آئی ءَ دیم داتگ اتنت ، وھدیکہ وت آئی راجی جنزمان ءِ جنگ ءَ بھر زرتگ ات، آ سیر ءُ ازگاری ءَ ابید ھم جنگ ءِ گرانیں ساھتاں دلگران ، نگیگ نہ ات – بلے انچو کہ مرچی سیمسری ھلک نزیک سر بوھان ات گڑا آئی ءِ دیم ءَ جرمن فوج ءِ اسلیں رنگ ءُ دروشم ءُ زوراکی پہ شری ءَ پدر بوھان ات ۔آئی وتی چم ھما جرمن سپاھیگاں سک داتگ ات انت ، کہ ایشان فرانس ءِ سرڈگار وتی بن ءُ بیھی جاگہ کتک ءُ نشتگ انت ۔یک راج دوستے ءِگرمیں پاھارے آئی ءِ دل ءُ جبین ءَ چست بوت ۔ انچش کہ چہ وتی جند ءِ زند ءَ سرگوازان ءُ راجی زندگ مانگ ءِ مارشتاں گوں ایر روان ات انت۔ دو انگریز ھم ھمے ڈبہ ءَ سوار ات ، کہ انچش گندگ ءَ پہ سواد ءَ اتکگ انت۔ چپ ءُ چاگرد پہ ھب چاران وتی زبان ءَ گپ ءُ گالاں دلگوش ات انت ، آ برے برے وتی نوٹ بک ءَ کشان ءُ جاگھانی ناماں گیر آران ات انت ۔

ناگت ءَ ریل گاڑی ءَ یک کسانیں میتگے ءِ اسٹیشنے ءَ داشت ۔ یک دراج ءُ سھر بروتیں جرمن آفیسر ئے آوانی ڈبہ انچش پہ گنوکی سر کپت کہ آئی ءِ لانک ءِ بستگیں کارچ ءِ گون پادا ایر کنگ آیاں ڈیک ورگ ءِ توار ءَ دراہ گڈینت انت ۔ آئی مود انچش سھر ات انت کہ پورا آس ءِ سر ءَ گرم داتگ انت ۔

انگریزاں نوکیں سرھالے دزکپت ، آ بچکندگو بوت انت ، وھدیکہ ڈیوبس ایشی ءِ گندگ ءَ گون وتی دیم ترینت وتارا ھالتاک ءِ وانگ ءَ دزگٹ کرت ۔انچش کہ دزئے ءِ وڑا کنڈے ءِ سرپیتگ ات۔

ریل گاڑی رھادگ بوت۔ انگریزاں یک نیمگے دست ٹال کنان جنگ ءِ گپ بندات کت، گڑا جرمن فوجی ءَ پادے دیم پادے پدی ایر کنان ءِ پہ پھر گشت۔ “اے ھما میتگ انت کہ ما درزنے فرانسی کشت ءُ سداں دزگیر کت انت”انگریزانی دلگوش گیش بوت ءُ آوان جست گپت۔”اے میتگ ءِ نام چے انت”برگ” جرمن فوجی ءَ پسہ دات۔”ما اے وڑیں فرانسی راج ءِ دیمپان، گون گوشاں گپت انت”

آئی ءَ گوں تژن ڈیوبس ءِ نیمگ ءَ چاران گشت۔۔۔ریل گاڑی دیم ءَ کنزان ات۔ ھر میتگ ءُ بازار چہ جرمن فوجیاں مان ریچ ات۔ انچش کہ افریقی مدگاں زمین ءُ زمان مانشانتگ۔ آفیسر ءَ وتی پنجگ مشت کنان ءَ گشت۔”اگاں من گون بوتیناں من یک فرانسی یے زندگ ءَ نیشت، اے زمین آس مان داشت، یک ھم مردمے پشت مہ کپتیں”انگریز ءَ ماں نرمی ءَ پسہ دات۔ “جی۔۔ھو”انگریز گوں اے گپاں بے وار بوت بلے ھچ ئِے نہ گشت۔ بلے آئی ءِ دیم ءَ چہ پدر بوت کہ نگیگ ءُ بے وار انت۔ “بچار گون، بیست سال ءَ تیوگیں یورپ مئے دست ءَ بیت، جرمن ءَ چش مچار”پدا جرمن فوجی کمے پشت ءَ کنز ات،آئی ءَ وتی نفرت ءُ کینگ ءِ دراھیں زھر کش ات انت۔ آئی ءَ وتی زھرناکی فرانس، آسٹریا ءُ دگہ ھندانی سر ءَ کش ات انت کہ پرے زوت ءَ آوان گپتگ ات انت۔ ناگت ءَ ھمے گپانی تہ ءَ آئی ءَ وتی بوٹ گون زور ءَ ڈیوبس ءِ زان ءَ دات۔ انگریز ھم اے ناگت ءَ ھرکت ءَ نگیگ کت انت۔آفیسر ءَ وتی تمباک ءِ پائپ کش ات ءُ جست کت ۔ تئی کر ءَ مشوک ھست کہ ناں؟ باریں چے گش ئے؟”اناں””گڑا ریل داری برو پمن بیار”پدا آ پہ توازہ کندگ ءَ لگ ات ۔”ترا تئ ترندآپ رس ایت”ریل ءَ سیٹی جئنگ بندات کت۔ دیم ءَ اسٹیشن پیداک ات، نوں دارگ ءِ وھد ات۔ اے اسٹیشن ھم سوتکگ ات۔ دارگ ءِ ھمراھی ءَ فوجی ءَ ڈیوبس بانزل ءَ گپت ءُ گران کنان گُر دات۔”برو زوت کن ھرچی من لوٹ اِتگ بیار”اے جاگہ ھم جرمن فوجیانی دست ءَ ات ، انجن دوارگ گرم گرگ ءَ پہ دارگ بوتگ ات ، گُڑا ڈیوبس ءَ گُشادی ءَ گوں دور کُت ءُ دومی ڈبہ ءَ سر کپت ، آئی ءَ ریل ءِ کاردار ءِ مکن کنگ ءِ پرواہ نہ داشت آ داں ایوک بوت وتی کوٹ ءِ بٹن ءِ پچ کُت انت ، سارتیں ساھے کَش ات ئے وتی ھیدئِے پھک کت انت ریل رھادگ بوت بلے ھردکانی دیم ءِ اسٹیشن ءِ سر بوھگ ءَ گوں فوجی پدا ھمد ءَ سر کپت ، آئی ءِ رند ءَ دوئیں انگریز ھم سر کپت انت ،انچُش مارگ بوت کہ آ ھمے ندارگ ءِ چارگ ءَ اتکگ انت کہ فوجی چے کنت باریں ؟”تو سرپد نہ بوت ئے من چے گوشت ،یا تو ھمے کار ءَ نہ کن ئے ” آئی ءَ گوں کندگے ءَ گشت۔”اناں گون من نہ بیت””من تئ بروتاں ٹال ٹال ءَ گوجین ءُ وتی لاپ ءُ پُر کناں “اے گُشان ءَ آئی ءَ وتی دست فرانسی مرد ءِ بروتانی نیمگ ءَ تِچک کُت ،آئی ءِ دست بروتاں سک بوھگی ات کہ فرانسی مرد ءَ ھمت کُت آئی ءِ دست ئےِ گِپت ءُ اورجتے، گردن ءَ دومی دست ءَ گِران ءَ سیٹ ءِ سر ءَ دیم پہ شکون دورے دات۔ پدا یک زھرناکیں دروشمے چہ آئی ءِ دیم ءَ پدر بوت ۔ آئی ءَ یک دستے ءَ ایشی ءِ گُٹ گِپت ءُ دومی دست ءَ مُشت پہ مُشت جنان ئے کُت تانکہ فوجی گُٹ گیر ءُ دم توس بوت، آفیسر ءَ لوٹ ات کہ وتی لانک ءِ خنجر ءَ بہ کَشیت بلے ڈیوبس آ پہ انچو بے واری گِپتگ ات کہ ھچ وارے نہ بوت ، مُشتان نزانت کہ کُجام نیمگ ءَ لَگّان ات انت آئی ءَ وتی تیوگیں جان ءِ وزن ھمیشی ءِ سرءَ داتگ ات ، ساہ ئِے بند بوت ءُ دپ ءِ ھون ءَ پُر ءُ ھون چہ دپ ءُ دیماں رِچاں بوت انت ، دپ ءُ دنتان ءِ پُرشت انت ءُ دپ ءَ ھون گُلگل کنان بوت ، انگریز نزیک ءَ اوشتاتگ ات انت بلے ایوک ءَ ندارگ چارگ ءَ اتنت ، گیش ءُ گیوار ءَ نہ اتک انت ، اناگت ءَ ڈیوبس ءَ آ یلءَ کُت ءُ وتی سیٹ ءِ سر ءَ شُت ءُ بے وانکی نِشت ، جرمن سپائیگ پہ وار ءُ جزائیگی پاد اتک ءُ نِشت ، گپی گالی نہ ات وھدے ساہ ئِے بالا بوت گُڑا گُشگءَ لَگِ ات۔”دانکہ تیرے تئی دل ءِ کَل ّءَ ندیاں منی دل سارت نہ بیت، دیم ءَ اسٹراس برگ ءِ اسٹیشن ءَ منی ھمبرا کاھنت سبر کن تئ کار بیت ، شرتر ھمیشیں کہ منی دیمءَ چہ ٹگل””ھرچی کہ ترا دل پرمائیت بکن” ڈیوبس ءَ پسہ دات، ڈیوبس زھرءَ گوات گپتگ ات آئی ءَ وتی ساہ بال ءَ کُت ءُ گوں دوئیں انگریزاں گُشت ئے۔”باریں شُما منی ھمبرائے یا ناں؟”ھو چُٹِتَگ ئِے”دوئیناں پسو دات۔

ریل گاڈی ءَ داشت جرمن ءَ زوت وتی واستا ھمبرا درگیتک آیاں پِستول گون ات ، آ ھاک ءِ دیوال ءِ نیمگ ءَ جاہ پٹگ ءَ لَگ ات انت ، دومی نیمگ ءَ دوئیں انگریز گوں ڈیوبس ءِ ھمبراھی ءَ بیست گام ءِ دوری ءَ وداریگ ات انت کہ کدی بیت آ اے دیم ءَ بیا انت ، ڈیوبس ءَ ھچبر پستول ءِ سرءَ پائر نہ کتگ ات ، وھدے آیاں دیست کہ دشمن پیداک انت گُڈا یکے ءَ گوں زور ءَ گُشت بجن اڑے، وتاس ءَ آس دات مردک تتران زمین ءَ کپت ،آفیسر کپگ ءَ گوں مُرت۔ دومی ءَ دستے گھڑی پچ کتگ ات وھد ءَچاران ات کہ بازیں وھدے مروت ، ریل ھم پہ روگ ءَ ساڑی ات ، سھیں پہ بے کماری گنوک ءِ وڑا تچان دیم پہ ریل ءِ ڈبہ ءَ سرکپان بوت انت ،چمشاں چہ یکے ءَ وتی سرئِ کُلاہ دور دات ءُ گوں گل ءُ شادے ءَ بلائیں کوکارے دات ئے، دوئیناں ڈیوبس ءَ دست گران کُت ءُ وتی وتی سیٹانی سرءَ نشت انت۔