ھزاری زندے نزانتکاری کْرامے ءِ ایرجیگ
ھزار بومیں سما دل ملامے ءِ ایرجیگ
مکن پہ دژمن ءِ گارات ءِ لاگریں اوست ءَ
کلاتے الّمیں، کستانی آمے ءِ ایرجیگ
پہ شِزّ ءُ بون ءُ بڑاکو نہ بیت گھگیری
لِکم مھارے ءِ دازیں ھتامے ءِ ایرجیگ
نہ زندمان بیت ایمن نہ مرگ پردگ پوش
کہ زرد تنگہ شِپانی سلامے ءِ ایرجیگ
گوں گُل بھابدناں کیپ ءُ کدّھاں نوش ئے
پہ راج ءَ بزّگ ءُ بے شامیں، شامے ءِ ایرجیگ
شمشتگ ئے چہ وتی زند ءِ شپ جتیں بھر ءَ
بچار اے زرد ءَ کہ ناکامیں کامے ءِ ایرجیگ
اے لچہ کاری اِنت شھلچہ کار ءِ شاھیں کلام
ھزار سر ، سید ءِ شاھگامے ءِ ایرجیگ