نئے شھربانو ، نئے تو گُلی
گیتانجلی ،او ! گیتانجلی
وتی دود ءُ رسم ءُ رواجاں شموش
اے کَلیّگ ءُ مشک ءُ نپاداں شموش
اےشیکِن اےپتکینک،اےکولیں نان
اے گْوانزگ، اے کاپر، اے پَلّ ءُ بان
کھیر ءُ کُنر تئی، اے گَزّ ءُ کلیر
اے گوک ءُ ننگار چِنالانی چیر
تئی کارءَنیائنت کہ جِندئیگ انت تئی
برو دیریں مُلکاں تو دگر ءِ بہ بی
زھیروک ءُ نازینک ءُ سؤتاں شموش
غزل دائم پِربند ، تو ڈئیکو مہ جن
پہ دوستاں دِلی نوں تو ھائیکو بہ بند
وتی لبز ءُ گالاں زبان ءَ شموش
وتی جِند ءِجانءَ چہ پَشک ءَ لگوش
تو تلوس پہ غالب، پہ میر ءَ بہ زَر
بِکن لئیب ءُ گْوازی تو مُلکاں بہ تَرّ
بالاچ شموشتگ، شموش چاکر ءَ
مکن یات گْواھرام ءَ ، بِلّ کمبر ءَ
ملّا شموشتگ ، تو فاضل شموشت
توسیمُک شَمُشتگ،توماھل شَموشت
ھانی ءُ شے ءَ تو لیک ئے گنوک
دنیاءَ نام اِنت تئی برات کشوک
گُشنت بولی وشّیں اگاں جندءِ بدیں
وتی راہ ءَ یل دنت ، آ مردم رَدیں
چین ءَ بِچار تو کہ جاپان نہ بیت
دگر ءِ ڈگار ءَ تئی رہ مان نہ بیت
وتی سر ڈگار ءُ زبان اِنت وتی
وتی گُشتگیں گپّ بیان اِنت وتی
وتی ڈنّ ءُ ڈنگر، وتی کِشک ءُ کئور
اےجمبر وتیگ اَنت وتی تْرمپءُھئور
دگہ کسّے ءِ تو کہ رَندا کپ ئے
چو گولو گْوارگءِ تو پَندءَ کپ ئے
نہ بنت دوست جان ءِ ترا پَندولءُپَشک
کَٹیر دُرْج دَپیں تئی، اے کَلیّگ ءُ مَشک
کیّا تئیگ اِنت ، سَدو اِنت تئی
وتی مُلکءِھر کَھن ءُ جو اِنت تئی
بالاچ تئیگ اِنت ءُ دودا تئی
بیبگر تئیگ اِنت ءُ گراناز تئی
تئیگ اِنت حمیدءُاُمرجان تئی
گَرابیک ءُ گَزّی ءُ دِلجان تئی
نوروز تئیگ اِنت، نصیرخان تئی
کلات میری ءِ تئی ءُ مُلتان تئی
سَتر ھُشکءُواریں تئیگ اِنت زمین
خاران تئیگ اِنت ءُ سیستان تئی
گَلا دشت ءُ مند ءَ، تو کیچ ءَ گَلا
کہ جندءَ تئی برْاہیت سرءِتئی کُلاہ
پتو سنجءُگنج اَنت تئی تیسءُ بِریس
بمپُور ءُ سُھرکوہ تئی ھَست ءُ نیست
جِند ءِ تئی چاگرد تئی جنّتیں
کوش تئی سباءِتئی روچ برکتیں
اے مھلوک ءُ مردم اےبےھِرکتیں
پکیر ءُ گَدا اے دُرْہیں بے وتیں
وتی بولیاں من چِتور یل کناں
من بکال ءُ گؤر ءِ کہ رَند ءَ تچاں
وتی لبز ءِ شیدا ، زبان ءِ وتی
وتی جِند ءِ دانک ءُ بیان ءِ وتی
من گیگاناں بِلّ ئِے کناں فاضل ءِ
من بوھیر ءِ گالاں، سُخن قاسم ءِ
من دربُرتگ فیض ءُ من ونتگ فراز
مناں جوش ءُ ٹیگورءُ جِبران ءِ راز
میرواڑی دوست اِنت،جوانسال دوست
نصیر نپت ءُ بیریں وتی گال دوست
ابابگر ءُ عِزّت ، من ءَ عنقا دوست
سیددوست اِنت،تچکیں وتی راہ دوست
منءَدوست وتی رسم، منا دوست راج
وتی کاڑ غزالیں دل ءِ تخت ءُ تاج
من شیدا زبان ءِ، من لبز ءِ ھدوک
وتی چمّ دوستاں، وتی چمّ ءِ روک
من ءَ تو، شگاناں مہ جن دلبر ءِ
پمن شیئر وشّ اَنت گُلیں ساحرءِ
وتی لبز ءِ بندیگ، زبان ءِ وتی
من کِسّہ مُرید ءِ کمان ءِ وتی
من ناعلمیں جِند ءِ ھیالاں وتی
وتی جند ءِ چاگرد، موالاں وتی
من ءَ چہ ھیالاں وتی پچ مَگِر
منءَروچءَمہ ڈوبار، شپءَسرمَگِر
زبان دُر بیان اِنت بلوچی منی
منی باندات ہمیشءُمروچی منی
منی لبز ءُ گپتار بیان اِنت ہمیش
پمن گنجءُگوھر، پمن کمّ ءُ گیش
زبان زندگ بات ءُ سلامت بہ بات
میاریگ بات شوھاز ملامت بہ بات
